ஆயிரம் எண்ணங்கள் 8

உறவுகள்

உறவுகளின் வினோதமான கோணங்கள் பல சமயம் நமக்குச் சரியாக புரிவதில்லை. இளமையின் காதல் என்பது இயல்பானது. காதல் மட்டுமே உறவுகள் அல்ல.உறவு முறை எதுவானாலும் (பாசமோ,நட்போ,காதலோ,பெற்றோரோ), அதை அமைதியும் மகிழ்ச்சியும் தரும் வகையில் அமைத்துக் கொள்ளவது நம் கையில் இருக்கிறது.

எந்த மனித உறவும் உணர்வுகளின் அடிப்படையில் அமையப்படுவது தான். பாசம் என்பது இயற்கையாகவே வருவது. ஒரு நல்ல நண்பர்களிடமும் இருக்கலாம். பெற்றோரிடம் இல்லாமல் போகலாம். கருணை என்பது மனித குணம்;கஷ்டப்படும் யாரிடமும் தோன்றலாம். இது எல்லாம் உறவுகளிடமும் தோன்றலாம். கருணை,பாசம் இவையிரண்டும் எல்லோரிடத்திலும் இருக்கும். இது நமது உறவுகள் சரிவர அமைய அவசியம்.

உறவுகளில் நமக்கு அவசியம் தேவை புரிந்துணர்வு. ஒவ்வொரு மனிதரும் உணர்வுகளின்,உணர்ச்சிகளின் இயக்கத்தில் தினம் மாறுவது இயல்பு. எப்போதும் நமக்கு பிடித்த மாதிரி இருக்கவேண்டும் என்று எதிர்பார்த்தல் அது சாத்தியமில்லை. நாம்கூட எப்போதும் ஒரே மாதிரி இருப்பதில்லையே. எதிர்பார்ப்பு என்பது உறவின் இன்றியமையாத அங்கம்தான். இன்னொரு வகையான எதிர்பார்ப்பு நம் விரும்பியபடியே இன்னொருவரும் இருக்க வேண்டும் என்பதுதான். இதனாலையே உறவுகளுக்கிடையே இறுக்கம் உருவாகிறது.

எந்த உறவையும் அவசரப்பட்டு அதிகப்படியான எதிர்பார்ப்புகளோடு ஆரம்பித்துவிட்டால்,அமைதியாக சிந்தித்து செயல்ப்பட்டால் சந்தோசம் மிக எளிது.உணர்வுகள் உண்மைக்கு மிக மிகச் சொந்தம். உறவுகள் தெளிவாகவும்,உறுதியாகவும் இருந்தால் மனம் அமைதியானதாகவும் செயல் ஆற்றல் மிக்கதாகவும் வாழ்க்கை இனிமயனதாகவும் அமையும்.